ARLENE

Afterschool Study Room

「唉! 放學要補習, 又要去 Star_ucks 買杯咖啡坐低做功課! 」ARLENE 嚟緊會開設班房長期做 Study Room! 大家唔洗專登行落中央圖書館或者去Coffee Shop 啦!

 

爭取聖誕派對及畢業日拍攝時間延長

「Christmas或Grad Day嘅影相時間都係得咁短，點黎得切同班friend影相喎…」ARLENE都深知同學有呢方面訴求，所以我哋會爭取延長聖誕派對及畢業日嘅拍攝時間，俾大家好好紀錄低美好嘅時光！

 

爭取維持女同學於聖誕派對可以穿著長裙之措施

ARLENE會爭取維持女同學喺Christmas Party可以著長裙嘅措施，等大家都可以靚靚咁返學，同friend影返啲靚相！

 

爭取改善醫療室環境

ARLENE明白同學唔舒服嘅時候都想要返個安靜嘅環境好好休息，所以我地會爭取喺醫療室增設簾或屏風，同學可以好好休息之餘仲保障返自己嘅私隱~

 

S6 Last Day

中學生涯最後一個返學日梗係要留返一個美好回憶啦！ARLENE會向S6同學提供水筆，方便係朋友嘅校服留低自己嘅祝福話語啦！

 

衛生巾提供

ARLENE明白女同學每個月都會有唔舒服嘅幾日，所以我地會喺每班的班會儲物櫃中，每月放置一定數量的衛生巾，供女同學應付緊急情況，有需要嘅同學可到班會儲物櫃自行領取^ ^

 

上課時間表

「咦？今日有咩堂上啊？」

成日唔記得要上咩堂？

ARLENE會將每班的上課時間表製作成小卡派發給同學，背面仲會包含幾間外賣餐廳嘅電話

唔記得左就攞出黎睇一睇，夠曬方便！

 

文具訂購服務

驚自己買錯cal機？啲原子筆塗改帶又好快用曬

唔緊要~ ARLENE會為大家提供文具訂購服務，咁就唔洗自己出去買咁麻煩啦！

 

紙箱 / 紙袋提供

每次假期同考試前要清locker嘅時候，塞爆曬個書包都裝唔曬啲書？

ARLENE會為大家提供紙箱 / 紙袋，供大家於放假前或結業日將書本帶返屋企，咁就唔洗一袋二袋咁拎到咁狼狽啦！

 

雨傘租借服務

天氣不似預期，前一秒仲陽光普照，下一秒都可能會落滂沱大雨

因此，ARLENE將在雨天時喺學校入口當值，為同學提供借遮服務，唔記得帶遮都唔驚會變落湯雞啦~

 

DSE 時間表 Wallpaper

DSE呢啲咁重要嘅日子點可以唔記得！

ARLENE將DSE timetable整成左靚靚wallpaper~ 

各位2024dser可以set喺電話，時刻提醒自己好好溫書啦！

 

考試時間表 Wallpaper

次次唔記得要考咩科都要突登攞返張紙出黎睇，咁麻煩㗎...

ARLENE將會將考試timetable design做wallpaper！一開電話，考試timetable就一目了然啦^ ^

 

暖包提供

著曬厚衫，對手都仲凍到結冰？

ARLENE會喺天氣寒冷嘅日子於校門派發暖包，陪你度過一個暖笠笠嘅冬天！

 

Google Form Questionnaire

無論你係對學校嘅措施有咩意見

或者想我哋加辦活動都好

都可以嚟投稿

ARLENE會盡最大嘅努力幫大家爭取

 

Sub-committee Recruitment 

搞活動從籌備到實行會歴經唔少嘅時間

而單單靠著15位內閣成員會係一個艱巨嘅任務

所以我哋誠意邀請你哋同 ARLENE 攜手前行

幫助我哋完成每個精彩嘅活動